Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Straatkat se kans

Coin ge-flip
Met very high hopes
Heads or tails
Hoe gaan hy val vir my
Asem-inhou-afwagting
Hart-inmekaar-krimp-teleurstelling
Verloor … weer … weer … weer
Elke liewe flippen keer
Stert-tussen-die-bene-omdraai-en wegloop
My menswees op ‘n ander plek gaan verkoop
Want hierdie is nie my stukkie grond nie
Is nie my plekkie in die son nie
En ek is nie goed met tweede kom nie …
Ek sal jou lyf kan deel … maar nie jou hart nie
Daai ene is te moeilik vir my
En liewer niks as wat ek fake-liefde kry

(15/04/2016)

My Kind

Trek aan jou plakkies
En kom saam met my
Want hier gaan ek en jy
Kort voor lank met die wêreld stry

Gryp jou sonbril en jou hoed
Kom laat ons waai
Ek wil nie ‘n minuut langer hier draai
Waar mense beurte maak om onmin te saai

Bring jou swembroek
Ons gaan in die see baljaar
Tot die branders binne-in ons bedaar
En ons weer kans sien om die wêreld in die oë te kyk

Terugkom … ken lig … sterk staan …
Want gaan dit rêrig oor hoeveel keer jy val
Hoeveel keer jy in die lewe verdwaal
Ons gaan ok wees … ek en jy
Want as ons saamloop … sal ons bo bly!

(13/04/2016)

Mooi Drome

Al die stukkies lekker van gister
se nasmaak bly in my
laat my blinkoog lag
vir die wind
met al sy stof,
al waai my hare woes
my gesig en hande na die son gekeer

Dis genoeg vir my –
Vir eers sal dit doen
sodat ek nog net so rukkie weer
my lekker droom kan droom
Môre sal ek weer
met nuwe krag
die werklikheid vierkantig pak

(1996)

Detox

Vee jou foto’s van my selfoon af
Block jou
Unfriend jou
Delete jou
Jaag jou uit my hart
Verban jou beeld uit my gedagtes
Skeur elke stukkie van jou uit my lewe
En, al pyn dit hoe …
al hunker ek hoe …
Detox!
Onttrek!
Leë verslawende soet woorde
waarmee jy my senses verdof
genoeg … genoeg … genoeg
ek kan sonder jou leef

(24/04/2016)

Alleen

My God
Verdien ek hierdie lewe
Hier’s dan niks om na te strewe
Uitgespoeg
soos Jona deur ‘n koue vis
Vreemde mense
Vreemde land
Dorre spore in die warm sand
My Heer
My liefde dan net nooit genoeg
My menswees hier het dan geen waarde
Geen druppel moed op hierdie godverlate aarde
Verniet
My ideale vaal gewas
Met sout-trane wat net bly brand
Hul kyk verby die omgee en die vriendskap wat ek bied

(1989)

Mamma ek mis jou!

My voete is vreeslik koud Mamma
want jy is nie daar
om ‘n kombers oor my te gooi
met jou gebede te keer
dat aards-goed my meesleur

My oë voel vreeslik swaar Mamma
want jy is nie daar
om die vlinders en die blomme vir my te wys
met jou wysheid my te lei
dat die lewe se skadu’s agter my bly

My hart voel dom Mamma
want jy is nie daar
om vir my te vertel
hoe om ‘n mens-boom reg te snoei
en hoe om mosterd-saad te groei

My dag voel leeg Mamma
want jy is nie daar
om dit om dit kleurvol te maak
en interessant te hou
altyd oulike goetertjies om jou

(05/04/2016)

Second-best

Om altyd daar te wees as jy my soek
Die res van die tyd, in jou dag se hoek
Stil-bly eensaam as jy my vermy
En stert-swaai bly vir elke bietjie aandag
Dalk blaai jy vandag tot by my nommer in jou boek

Om te weet eks nie dié ene maak so seer
En jou hart is al wat ek begeer
Maar altyd net tevrede bly
Met afskeep-liefde en krummel-tyd
En hunkerend bly soek na meer

En dis die storie van my lewe
Sewentig maal sewe sal ek jou vergewe
Al breek dit flenters in my hart
al sukkel ek soms om my smile op te plak
Want ek lief jou
Sewehonderd en sewentig maal sewe

(1/4/2016)

My naam

Skryf my naam
binne in jou boek
en as die lewe jou maak soek
warmte en ‘n helder lig
dan lees jy dit en weet
vir altyd sal ek jou rigting wees

Skryf my naam
teen jou huis se muur
en in die nag se koue uur
as alleenheid in jou murg wil kruip
laat memories van my in jou brand soos vuur
om die donkerte te verdryf

Skryf my naam
oor jou lyf
en as gister se demons jou vreugde wil steel
jou loop te swaar laat voel
laat my liefde warm oor jou spoel
en my omgee soos die son se strale oor jou streel
Skryf my naam
Diep in jou hart
Want soms vat die lewe se vingers swart,
los sy merke oor jou siel
los jou langs die pad alleen
seer … vertrap … verniel

Roep dan my naam
en gooi hom in die wind se draai
en ek kom gou
om jou op te tel
en vas te hou
en styf teen my te druk
tot jou voete sterk raak
en jou oë weer blink

(28/03/2016)

Kokon

My siel pas netjies in jou hande
en jy spin woorde rondom my
Silver drade, blink en sag
Wens net ek kon weet
wat in jou hart gebeur
Wens dat ek kon sien waarin jou sê
se wortels water drink en lê
want dit sal bepaal wat ek gaan wees
daai dag as dit tyd raak vir my
om uit hierdie sagte blink kokon
die regte lewe in, uit te kom.

(15/03/2016)

Om te laat los

Ek sê ek cope
maar ek doen nie.
Ek bly net gee
terwyl ek eintlik niks besit nie
My hande vuil
my klere stukkend
soos ek soek en grou
na als wat blink
maar my net bly ontwyk.

Om te kan wees
ontbloot
gestroop
met niks om weg te steek
om dinge wat ek myne noem
net daar langs die pad te los
en verder kaalvoet in die son te loop
op my eie
warm onder my voete
en warm in my gesig

Ek dink, dan sal ek cope
dan sal ek okay wees.
Miskien ook vry wees
om ietsie nuut ‘n kans te gee
om binne my te groei
net eers wag vir die einas
om op te hou bloei.

(10/03/2016)

My breekhart

Van hierdie breekhart sal ek jou nie vertel nie,
en van die seer sal jy nooit weet nie.
Ek sal alleen my hart vashou,
my stukkende siel opdroog
en dan my hande was met sout.

En môre … groet ek jou met blink oë
en ‘n breë smile op my gevreet geplak.
Sal my ken lig
en my rug styf maak

Sal jou nooit wys hoe seer jou trap my maak nie,
want
of dit maak dood-
of dit maak groot!

(10/03/2016)

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

What abou’ de lô? is ’n kortfilm deur Charles Badenhorst, geïnspireer deur die gedig van Adam Small.

Die artistieke regisseur is Diek Grobler.

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Die Strop

klokslag 3:34 staan my oë op aandag
die dag is jonk
slaap is vir die oningewydes

natuurlik het ek ‘n hoofpyn
nie van die tekort aan nikotien nie
maar die chemiese onttrekking uit jou

wat maak dit tog saak
as my borskas op drie verskillende plekke skeur
ek gaan elkgeval heeldag net hier lê
en die aaklige breuk tussen jou hand en my mond dokumenteer

dis ‘n argiewelike ding
die kru kreukels slegs leesbaar
as jy reeds verstaan
(wil verstaan, verstaan het)

dat wat ons aanmekaar gehou het
nie ‘n uitstorting van hart aan hand aan bloed en sweet was nie
maar ‘n aangebore onuitgesproke verpligting
vol verwagtinge waartoe nie een van ons in staat was nie

so lê ek nou nog hier
ses-en-twintig jaar later
en saag eentonig en aanhoudend
aan vader-dogter-dogter-vader

Verlore soos – Elle Warren

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Adam Small is op Saterdag 25 Junie 2016 oorlede nadat hy die vorige dag ’n operasie ondergaan het.

Small was een van die reuse van die Afrikaanse letterkunde. Hy het groot aansien geniet as digter, dramaturg en akademikus. Small het veral stem gegee aan die werkersklas, beide deur die temas van sy werk en die wyse waarop hy Kaapse Afrikaans as literêre taal gevestig het.

Die erkenning wat hy moes kry het eers later in sy lewe gekom, weens die omstredenheid van sy werk vir Apartheidsinstellings. Eers in 2012 is die Hertzogprys aan hom toegeken.

Sy werk sluit in Verse van die Liefde (1957), Klein Simbool (1958), Kitaar My Kruis (1961), Sê Sjibbolet (1963), Kanna hy kô hystoe (1965), A Brown Afrikaner Speaks: A Coloured Poet and Philosopher Looks Ahead (1971), Oos Wes Tuis Bes Distrik Ses (1973), Black Bronze Beautiful (1975), Joanie Galant-hulle (1978), Krismis van Map Jacobs (1983), Kô lat ons sing (2011), Goree (2013) en Klawerjas (2013).

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Die spieëlbeeld van fantasie

Is dit ‘n spieëlbeeld? Of is dit ‘n fantasie?
Waaraan meet ons die pols van die lewe?
Klop die eenvoud ritmies? Of is dit ‘n fabelagtige melodie?
Is die vae hoop wat ons koester net ‘n glinstering in die oog van die dromer?
Of maak ons, ons swerwende drome ‘n realiteit in ons fantasiewêreld?
Blink die blink so skerp?
En kleur die kleur so helder?
Of fantaseer ons in ons fantasie oor hoe om ons innerlike wese tot oordadige sprokies mooie eenvoud te verwesenlik.

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Gedigte in McGregor vind vanaf 26 tot 28 Augustus 2016 plaas. Daar is `n groot verskeidenheid interessante en dinamiese digters wat vanjaar hul werke gaan deel.

In die Afrikaanse kategorie kan gedigteliefhebbers uitsien na voorlesings deur onder andere Margot Luyt, Koos van der Merwe, Daniel Hugo, Diana Ferrus en Lara Kirsten. Engelse digters sluit James Matthews, Patricia Schonstein, Kobus Moolman, Khadija Tracey Heeger, Harry Owen, Elisa Galgut en Vangile Gantsho in, om maar net `n paar te noem. Louise Westerhout, die wenner van verlede jaar se gedigtekompetisie, is ook vanjaar op die verhoog. Daar is ook digters soos Margaret Clough en Stephanie Saunders wat jou eindeloos sal vermaak met hul fyn humor. Dan is daar ook `n paar groepe wat gaan optree, onder andere UWC poets, Lingua Franca, Spoken Word Movement en Mothertongue.

McGregor is die perfekte dorpie vir die viering van digkuns. Die lokale is loopafstand van mekaar en die plattelandse sjarme van die dorp dra by tot `n unieke ervaring. Die optredes sal plaasvind in die sielvolle tuine van Temenos, `n lieflike agtertuin Amfiteater, die Wahnfried Teater, Edna Fourie Gallery, The Green Room en The Lion House. Carol`s Pub is die plek om te wees vir die Voices on Fire-kroegprogram. Terwyl jy `n lekker glasie wyn drink, sal digters `n klokkie lui en spontane voorlesings doen.

Daar is ook vanjaar weer `n aanbieding van die gewilde Open Mic-sessies. Hierdie sessies word gelei deur Hugh Hodge. Enige iemand wat graag sy/haar gedigte wil voordra is welkom. Die wat wil meemaak kry `n nommer en wanneer die nommer gelees word sal hy/sy `n kans kry om `n gedig te deel. As daar tyd is, kan dieselfde persoon ook meer as een gedig voordra. Almal is welkom om dit by te woon. Geen kaartjies of besprekings is nodig vir die Open Mic-sessies nie.

Oop kategorie Voices on Fire Gedigte Kompetisie: Het jy al ooit daaraan gedink om `n gedig te skryf? Is jy `n ongepubliseerde digter en 19 jaar of ouer? As die antwoord op al hierdie vrae ‘Ja,’ is, is jy welkom om in te skryf vir hierdie kompetisie. Die wenner gaan wegloop met `n trofee en R7 500.00 kontant. Die finaliste se werke sal ook oorweeg word vir die Poetry in McGregor digbundel en hul sal die geleentheid kry om dit tydens die gedigte-naweek voor te lees. Inskrywings sluit Vrydag 22 Julie. Vir meer inligting gaan na: https://mcgregorpoetryfestival.blogspot.co.za/

Of jy nou oor akademie skryf of net oor hoe baie jy van jou koffie hou, jy en jou woorde is welkom. Kom kuier saam met ons en geniet die samesyn en woordkuns van ons land se wonderlike digters.

Kaartjies is beskikbaar by Computicket vanaf middel Julie.

#PoetryMcGregor

McGregor Gedigtefees 2016

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Afskeep-kind

Eenkant kniel ’n afskeep-kind,
biddend langs sy bed.
So weggestoot en onbemind
vra jy dat Jesus jou kom red.

Die agterspeen ken jou goed
en krummels is jou kos.
Somtyds as die storms woed
word jy buitekant gelos.

Niemand hoor jou huil
of steur hul aan jou klag.
Selfs sou jy lewe vir dood verruil
sal jy vergeet word in ’n dag.

Maar die koue wêreld sal nog hard kom vry,
na ’n eenkant afskeep-kind soos jy …

Karoo-land rym

Stil lê die vlaktes diep in die nag,
onder ’n skitter lig van sterre prag.
Blou-wit lê die Karoo-land se kou,
sag verlig deur die maanlig so flou.
Iewers doof daar ’n eensaam uil
die verlate klank van ’n jakkals se huil.

Oor randjies heen strek die dorre aard,
en wyd gesaai lê sy bossies baard.
Waar die kille wind deur die lyndraad sing,
en jou stofpad langs na kuddes bring.
Stadig stoot die dag se blou
oor die wit karos van na-nag dou.

Jou swye hou al vir duisend jare.
Jou rooi-sand bloed pols in jou eensaam are.
Karoo-land my hartland, o stille en alleen-land,
jy het jou tydlose prag, in my siel ingebrand …

Brandoond

Hoe lus ek nou ’n stukkie brood!
Wanneer armoede kom
word hy vergesel deur hongersnood.

Met elke nuwe eensaam dag,
skyn daar ’n bietjie hoop,
wat weer verdof met met elke nag.

Elk dag kom ek al nader
aan die brandend oond.
In my laaste sal ek roep na jou,
en vir oulaas sal
ek jou, styf in my gedagtes hou …

Spore

Ek trap met ’n gebarste voet langs die geroeste lyne.
My voetspore langs metaal spore van vergete treine.
Hierdie spore wat nou verlate lê in die mot en reën,
en draaiend oor die bulte loop na nêrens heen.

Voor lê die trein se spore begrawe onder klip en sand,
en loop die voetpad ingebed langs die krans se rand,
waar ek net soos gister en elke die dag tevore
my verbygang sal neerskryf met my modder spore.

Oor my skouer tuur ek terug, wyl ek my gewis,
dat die boemelaar se spore in die reën, myne is.

Dood van ’n dag

Jou diepste prag is in jou sterwensuur,
dan ek ruik jou somber na-dag geure.
Soos ’n verfpot in ’n skemervuur
met helder skarlaken kleure.

Jy verf die son se strale
met purper, pers en geel,
met helder piek en oranje,
wyl jou laaste asem deur my hare streel.

Op die wolke skilder jy jou boodskap; “Ek gaan sterf.”
’n Oomblik in tyd is verby,
maar jou bestaan is op ewigheidsdoek uitgeverf.

Lag en traan

Elke tog kom tot ’n end,
en selfs die hartlikste lag bedaar.
Somtyds verloor ’n rykman elke sent
en geluk beval ’n swendelaar.

Vir elke hallo is daar koebaai,
elke vrolik lied raak weer stil.
’n Reguit pad sal weldra draai
en die warmste welkom raak ook weer kil.

Saam elke bietjie liefhê
kom daar ook ’n bietjie haat.
Vir elke slag wat ons lepel lê
is daar tye wat ons nie praat.

Om elke snoesige vuur waai ’n koue wind,
onder elke helend pleister gaap nog ’n bloeiend wond.
Met die vreugde van elk nuutgebore kind,
Wag daar eendag net, nog ’n gat in die grond.

Lied van die wind

Met weemoed sing die wind
soos die droewige huil van ’n hartseer kind.

In sy lied dra hy met hom saam
gedigte van liefde lank vergaan.

Oor vlaktes en oseane heen
druis jou donder stem en bring jy reën.

Somtyds sing jy van nuwe hoop
en somtyds is jou sang in smart gedoop.

Ek hoor vanaand jou diep gedruis
as jy huil om die hoeke van my huis.

Vertel my nou wat jy my wil sê,
want jou lied hou op as jy gaan lê.

Kom verklap my jou geheim
van waar jy kom, en heen verdwyn.

En as ek saam met jou kon huil,
sou jou treurig simfonie ook my smart verskuil?

Dood van my pen (Aan die kritici)

’n Gedig is ’n woorde-skildery
en my pen ’n lewende kwas.
Maar vandag is my pen dood
toe dit deur varkpote vertrap was.

Op papier braak ’n adolessent
’n gesimuleerde LSD beswyming op.
Die stank en spatsels maak geen sin
maar die varke vreet dit gulsig op.

Verblind in die varke se vraatsug
sien hul nie skilderye van die woord,
en hul voorliefde vir braaksel vreet,
maak ons digters se penne dood.

’n Gedig is ’n woorde-skildery,
en my pen nie meer lewend nie.
Maar varke vreet in elk geval
semels en braaksel, nie skilderye nie …

Gideon C du Toit

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

“Mooi is die dood” deur Adam Small, voorgelees deur Koos Kombuis.

Daar’s ’n Leon, ’n Rocco, ’n tikmasjien, ’n klavier … en ander instrumente.

Leon van Nierop en Rocco de Villiers, twee bekendes in die vermaaklikheidswêreld, doen in dié produksie wat hulle glo hulle KAN doen, wat hulle GOED kan doen, wat hulle NIE so goed kan doen nie, wat hulle WIL doen, maar ook wat hulle NIE wil doen nie … en; wat hulle nou vir die eerste keer wil waag om te doen! Dit bring ‘n lighartigheid, erns en draakstekery met mekaar na die verhoog – maar dit bly altyd vermaaklik en verrassend.

Hulle beweeg van die bekende na die onbekende (vir die gehoor, maar ook vir hulleself), en waag dit buite hul gemaksones na ongemakliker (en ongerieflike) sones. So gaan hulle op ’n reis wat wie weet waar gaan eindig!

Leon en Rocco is 5 & 6 Augustus 2016 by die Boer restaurant teater in Durbanville om 20h30.
Kaartjies kos R160 en is beskikbaar by 021 979 1911.

Leon van Nierop en Rocco de Villiers

“Ek staan op ’n moerse rots” deur Antjie Krog, voorgedra deur Charlenè Brouwer.

“Hammie” deur Nathan Trantraal, voorgelees deur Ivor Price.

’n Film deur Marinda du Toit en Tessa Louw.
Perron deur Andries Bezuidenhout.
Artistieke regisseur: Diek Grobler.

Bibi Slippers lees “Liefdesvers” deur Loftus Marais.

Gedigte in McGregor vind vanaf 26 tot 28 Augustus plaas. Daar is ’n groot verskeidenheid interessante en dinamiese digters wat vanjaar hul werke gaan deel.

In die Afrikaanse kategorie kan gedigteliefhebbers uitsien na voorlesings deur onder andere Margot Luyt, Koos van der Merwe, Daniel Hugo, Diana Ferrus, Hermien de Vos en Lara Kirsten. Engelse digters sluit James Matthews, Patricia Schonstein, Kobus Moolman, Khadija Tracey Heeger, Harry Owen, Elisa Galgut en Vangile Gantsho in, om maar net ’n paar te noem. Louise Westerhout, die wenner van verlede jaar se gedigte kompetisie, is ook vanjaar op die verhoog. Daar is ook digters soos Margaret Clough en Stephanie Saunders wat jou eindeloos sal vermaak met hul fyn humor. Dan is daar ook ’n paar groepe wat gaan optree, onder andere UWC poets, Lingua Franca, Spoken Word Movement en Mothertongue.

Al die betrokke digters bring iets baie spesiaal na Gedigte in McGregor. Hier `n paar voorlesings om onder andere na uit te sien: (Vir `n volledige lys van al die digters wat gaan deelneem gaan na https://mcgregorpoetryfestival.blogspot.co.za/)

Lara Kirsten (foto: Kavish Rajpaul)

Koos van der Merwe se aanbieding heet Hoekom dan gedigte? Hoekom iets met ’n gedig wil sê? As jy dan kan e-pos, tweet, SMS of gewoon net kan praat, hoekom dan gedigte? Koos reis saam met jou na plekke waar jy weet gewone woorde nie genoeg is nie. Soms voel die hart te diep om net gewoon te sê. Soms skyn die lig te helder vir ’n alledaagse sin, en soms is dit te donker vir praatjies maak. Die hart is só dat dit soms niks kan sê en niks kan hoor nie … as net gedigte. Bo en behalwe Hoekom dan Gedigte? sing Koos van der Merwe ook Bob Dylan in Afrikaans as deel van die naweek se program.

Margot Luyt sê oor haar voordrag: “Poësie voer my dikwels so ver weg dat my eie angs, verlange en melancholie verflou. Die woorde, die emosie ontvoer my na plekke wat ek nie ken nie, maar dikwels oor droom. Plekke waar ek myself kan omvou met die atmosfeer van die vers. Kom luister na verse oor liefde – alle soorte liefde. Liefde vir die ongebore kind maar ook liefde tussen volwassenes en bejaardes.

Hermien de Vos

Die Mothertongue Jeugteater groep: Hierdie kreatiewe groep vermeng gedigte, musiek en dans in hulle voordrag. Al die materiaal is deur die groep self geskryf en saamgestel en word in Engels, Afrikaans en Xhosa aangebied. Sara Matchett is die direkteur van die groep wat bestaan uit Melenie Jakobs en Ashley Seconds (La Chasseur Farm), Jaydene Lekay (McGregor), Denise Gandu (Dwarswater), Sandile Kosana, Khayalethu Mkorwana en Simphiwe Mangqasa (Nkqubela).

McGregor is die perfekte dorpie vir die viering van digkuns. Die lokale is loopafstand van mekaar en die plattelandse sjarme van die dorp dra by tot ’n unieke ervaring. Die optredes sal plaasvind in die sielvolle tuine van Temenos, ’n lieflike agtertuin Amfiteater, die Wahnfried Teater, Edna Fourie Gallery, The Green Room en The Lion House. Carol’s Pub is die plek om te wees vir die Voices on Fire kroeg-program. Terwyl jy `n lekker glasie wyn drink, sal digters ’n klokkie lui en spontane voorlesings doen.

Daar is ook vanjaar weer ’n aanbieding van die gewilde Open Mic-sessies. Hierdie sessies word gelei deur Hugh Hodge. Enige iemand wat graag sy/haar gedigte wil voordra is welkom. Die wat wil meemaak kry ’n nommer en wanneer die nommer gelees word sal hy/sy ’n kans kry om ’n gedig te deel. As daar tyd is, kan dieselfde persoon ook meer as een gedig voordra. Almal is welkom om dit by te woon. Geen kaartjies of besprekings is nodig vir die Open Mic-sessies nie.

Of jy nou oor akademie skryf of net oor hoe baie jy van jou koffie hou, jy en jou woorde is welkom. Kom kuier saam met ons en geniet die samesyn en woordkuns van ons land se wonderlike digters.

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Woeps!

Daar verloor ek my hoed:
en alles wat ek daar in gepak het.

Die Karoo wind neem
geen gevangenes nie:
hoor

luister
geen bagasie
of kak idees nie.

niks is
te swaar of donker
Alles en almal breek en brand

in dié lig.

Verloor ons, onse moed,
jy, jou kleine-self,
en ek, my verlange na jou.

Die hoed waai weg
in ‘n duiwelse skop stof wind

en toe

vind ons die towenaar-kind
die kind in ek en jou

Die magiese wereld wat ons eens verloor het.

Deur: James Honiball

>> Nog Gedigte van James Honiball <<

Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Ons soek na Annarine Erasmus – haar gedigte verskyn op Roekeloos.co.za. Dit is in verband met die gebruik van haar werk in musiek. Sy kan gewoon haar kontakbesonderhede stuur aan bydraes@roekeloos.co.za