Stuur jou gedigte na bydraes by roekeloos.co.za Digters is ook welkom om een foto te stuur vir publisering.
Vir Ingrid Jonker
Pa, … pa waarom het jy my verlaat
Was dit ma se kranksinnigheid of was jou liefde groter vir die Nasionale Party staat
In 1943 was ek ses, my moeder en my kindwees verloor
Ek swerf rond en skryf gedigte wie sal my hartseer hoor
Pa, pa waarom moes ek en Anna by jou bly
Waarom my martel … net in my gedigte was ek vry
Opperman was my vriend, hy het my geleer
Ek het talent gehad pa, waarom wou jy my nie laat studeer
Ontvlugting het ek aan jou opgedra
Wat moet ek meer doen voordat jy my kan liefhê pa
Pieter, Pieter vat my weg, ek sal met jou trou,
In Johannesburg word ek ma … maar binne my bly dit rou
Simone jy is die lig in my depressiewe dag
Ek moet weg uit die swart, na ‘n nuwe begin wat in Kaapstad wag
Apartheid het my laat skryf oor Nyanga en ‘n swart kind
In 1961 het ek myself in Valkenburg-inrigting bevind
Andre P Brink en Jack Cope se liefkosings aan en af
Die hartseer na die aborsie, die ewige smag
Na liefde, aanvaarding, na gesonde verstand
In 1964 wen ek ‘n prys en vat Rook en Oker my na ‘n ander land
Saam met Breyten in die strate van Parys
Maar hy los my en gaan terug na sy vrou … na sy huis
Wie sal vir my lief wees pa, nie eers jy wou my hê
Ek is mal, depressief … moet ek dan vir die res my lewe in ‘n inrigting lê
Ingrid, Ingrid … Drieankerbaai wag,
Geen afskeid, geen begrafnis, geen graf
Ingrid, Ingrid … vat my hand
Ek herhaal jou … in die hiernamaals sal ek jou ontmoet op die strand
Pa … pa jy het my terug gegooi in die see
In die seewind ruik hulle my heimwee
Hulle ken my pa … hulle sing van my bitterbessie dagbreek
Hulle het my lief pa, … hulle sal my nooit vergeet!
Stuur jou gedigte na bydraes by roekeloos.co.za Digters is ook welkom om een foto te stuur vir publisering.